Sipas raportimit të BBC, këngëtari amerikan D4vd, emri i vërtetë David Anthony Burke, është ndaluar dhe po hetohet në lidhje me vrasjen e dyshuar të adoleshentes Celeste Rivas Hernandez në Los Angeles.
Sipas autoriteteve të cituara nga BBC, Burke është mbajtur në paraburgim pa lirim me kusht, ndërsa çështja pritet t’i referohet Prokurorisë së Qarkut. Hetimet lidhen me zbulimin e mbetjeve mortore të vajzës në shtator, në një automjet Tesla të regjistruar në një adresë të lidhur me këngëtarin.
BBC raporton se rasti është shqyrtuar nga një juri e madhe dhe se hetimet kanë vijuar për disa muaj përpara zhvillimeve të fundit. Deri tani, nuk është ngritur zyrtarisht aktakuzë ndaj artistit.
Avokatët e D4vd kanë mohuar akuzat, duke deklaruar se ai nuk ka lidhje me vdekjen e adoleshentes dhe se provat do ta vërtetojnë pafajësinë e tij. Sipas tyre, ai po bashkëpunon me autoritetet dhe ndalimi i tij bazohet vetëm në dyshime hetimore.
Autoritetet amerikane vijojnë hetimet për të përcaktuar shkakun e vdekjes së viktimës, ndërsa çështja mbetet ende e hapur./MAPO.al
