30 shkolla të reja do të hapin dyert nga 8 shtatori. Lajmin e jep kryeministri Edi Rama. Ai thotë se këto shkolla do të mirëpresin mbi 8 mijë nxënës dhe mësues.
Ndërkohë kreu i qeverisë premton se do të vijojnë investimet për ndërtimin e dhe rehabilitimin e objekteve arsimore kudo në Shqipëri.
“Më 8 shtator, në ditën e parë të shkollës do të hapin dyert 30 shkolla të rilindura nga veriu në jug, të cilat do të mirëpresin mbi 8 mijë nxënës dhe mësues. Vijojmë të investojmë për ndërtimin dhe rehabilitimin e objekteve arsimore, shkollave, palestrave e terreneve sportive, për të garantuar të njëjtin standard, kudo në Shqipëri”, njoftoi Rama.
Çfare shkroi Rama per shkollen “Angela Merkel”
Shkolla “Angela Merkel” në Kamëz, Rama: Krenar! Xhevahir arkitektonik ndërtuar në bashkëpunim të ngushtë me kryebashkiakun shembullor Rakip Suli
Kryeministri Edi Rama ka ndarë sot disa pamje të një shkolle të re në Kamëz, duke e cilësuar atë si një prej modeleve më të mira të investimeve në arsimin shqiptar.
Në një postim në rrjetet sociale, kreu i qeverisë shpreh krenarinë për transformimin e infrastrukturës arsimore në vend, duke theksuar se shkollat e gjeneratës së re ofrojnë kushte të krahasueshme me ato më të mirat në Europë.
Objekti i ri arsimor, projektuar nga studioja vendase e arkitekturës “CommonSense” dhe që mban emrin e Angela Merkel, vjen si pjesë e një nisme më të gjerë për rindërtimin e shkollave dhe kopshteve, të mbështetur nga qeveria shqiptare dhe Fondi Shqiptar i Zhvillimit, në bashkëpunim me Bashkinë Kamëz.
“Krenar për shkollat e gjeneratës së re që kemi ndërtuar me ngulm në këto vite, duke u krijuar faktikisht nxënësve e mësuesve kushte të njëjta si në shkollat më të bukura të Europës.
Kjo shkollë e projektuar nga “CommonSense” – një studio arkitektësh lokalë të rinj e plot talent, të cilët janë rritur shumë falë edhe bashkëpunimit me arkitektët e shquar ndërkombëtarë – e që mban emrin e Angela Merkel në respekt të mbështetjes që kancelarja dha pas tërmetit, është një xhevahir arkitektonik në kurorën shembullore të dhjetëra shkollave e kopshteve të rilindura në Kamëz nga Fondi Shqiptar i Zhvillimit, me mbështetjen e qeverisë shqiptare e në bashkëpunim të ngushtë me kryebashkiakun shembullor Rakip Suli” shkroi Rama në rrjetet sociale.
