Beyoncé është shpallur nga revista Forbes si këngëtarja e pestë miliardere në botë, duke u renditur mes njerëzve më të pasur në industrinë globale të muzikës. Artistja 44-vjeçare e ka arritur këtë status falë suksesit të jashtëzakonshëm të turneut të saj “Cowboy Carter”.
Sipas Forbes, turneu ka gjeneruar mbi 400 milionë dollarë nga shitja e biletave, ndërsa rreth 50 milionë dollarë të tjera janë siguruar nga shitjet e produkteve promocionale. Ky sukses e ka çuar pasurinë personale të Beyoncé-s në nivele miliardëshe.
Bashkëshorti i saj, Jay-Z, u bë muzikanti i parë miliarder sipas Forbes në vitin 2019. Më herët, statusin e miliarderit e kanë arritur gjithashtu Rihanna, Bruce Springsteen dhe Taylor Swift.
Edhe pse Beyoncé ka investuar në disa sipërmarrje, përfshirë markën e kujdesit për flokët Cécred, uiskin SirDavis dhe linjën e veshjeve Ivy Park, pjesa më e madhe e pasurisë së saj vjen nga muzika dhe turnetë.
Në vitin 2010, ajo themeloi kompaninë Parkwood Entertainment, përmes së cilës mori kontroll të plotë mbi karrierën e saj artistike, duke menaxhuar muzikën, koncertet dhe dokumentarët e saj.
Albumi i vitit 2024, Cowboy Carter, u prit me vlerësime të larta nga kritika dhe i solli Beyoncé-s çmimin Grammy për albumin e vitit. Turneu që pasoi publikimin e albumit u rendit si turneu muzikor me fitimet më të larta në botë për vitin 2025.
“Në çdo kategori të industrisë së argëtimit, praktikisht nuk ka ndërmarrje më fitimprurëse se një muzikant që mbush stadiumet,” shkruan Forbes.
Beyoncé e nisi karrierën e saj si anëtare e grupit Destiny’s Child, përpara se të ndërtonte një nga karrierat solo më të suksesshme në historinë e muzikës. Ajo mban rekordin si artistja më e vlerësuar dhe më e nominuar në historinë e çmimeve Grammy.
