SPAK në bashkëpunim me autoritetet italiane – konkretisht Drejtorinë Hetimore Antimafia të Barit dhe Skuadrën Mobile të Policisë së Andrias – kanë ndërmarrë që nga orët e para të mëngjesit të sotëm një operacion të gjerë ndërkombëtar në Tiranë dhe në disa zona të tjera. Ky operacion po zhvillohet në kuadër të një Ekipi të Përbashkët Hetimor, i mbështetur dhe i koordinuar nga Eurojust.
Sipas të dhënave, ky hetim i përbashkët është përqendruar në dy drejtime kryesore. Së pari, ai synon zbardhjen e vrasjes së shtetasit italian Francesco Diviesti, një parukier 26-vjeçar nga Barletta, i cili u zhduk më 25 prill 2025 dhe u gjet i vrarë e gjysmë i djegur katër ditë më vonë në Canosa të Pulias. Së dyti, operacioni godet një grup të strukturuar kriminal me bazë në Tiranë, i cili dyshohet për pastrim ndërkombëtar parash përmes transferimit të shumave të mëdha financiare nga Italia drejt Shqipërisë.
Si rezultat i këtyre hetimeve të dokumentuara nga Antimafia e Barit dhe autoritetet shqiptare, gjykata ka lëshuar 10 masa sigurie, nga të cilat deri më tani janë ekzekutuar 4 urdhër-arreste. Mes të ndaluarve është Ergys Kastrati, i cili rezultonte i kërkuar ndërkombëtarisht prej dy vitesh nga të dyja vendet; ai u prangos nga forcat speciale gjatë një ndërhyrjeje në një vilë në një zonë rezidenciale në Tiranë. Ndërkohë, disa nga personat e tjerë ndaj të cilëve është caktuar masë sigurie ndodhen aktualisht jashtë vendit.
Në shënjestër të këtyre hetimeve është Igli Kamberi, i cili konsiderohet nga hetuesit si kreu i këtij grupi kriminal. Përveç aktiviteteve të trafikut të drogës dhe pastrimit të parave, Kamberi akuzohet zyrtarisht se në bashkëpunim me katër persona të tjerë ka ekzekutuar 26-vjeçarin Francesco Diviesti në prill të vitit të kaluar.
Ky nuk është skandali i parë i rëndë ku implikohet Kamberi në shtetin fqinj. Më 8 gusht të vitit 2015, ai ishte arrestuar nga policia italiane së bashku me një tjetër shtetas shqiptar, Artan Belliu. Në atë kohë, të dy akuzoheshin si pjesë e një celule kriminale që kishte planifikuar vrasjen e kryekëshilltarit të Partisë Demokratike në komunën e Barletës, Pasquale Ventura, ngjarje kjo e planifikuar për t’u ekzekutuar më 20 janar të vitit 2015.
Operacioni dypalësh i koduar mes SPAK dhe antimafias italiane është ende në vijim e sipër në terren, ndërsa autoritetet ligjzbatuese të të dy vendeve pritet të dalin me njoftime zyrtare për të zbardhur bilancin e plotë të kontrolleve dhe arrestimeve.
