Një sulm me thikë ndodhi në një stacion treni në Zvicër sot, ku mbetën të plagosur tre persona dhe policia e cilësoi se ishte një akt terrorizmi.
Ky konkluzion u arrit pas arrestimit të një të dyshuari, i cili më parë ishte akuzuar për përhapjen e propagandës së Shtetit Islamik.
Policia tha se kishte arrestuar sulmuesin e dyshuar, një 31-vjeçar me shtetësi të dyfishtë zvicerane dhe turke nga Winterthur, një qytet në periferi veriore të Cyrihut. Sulmi ndodhi rreth orës 08:30 sipas kohës evropiane.
Mario Fehr, drejtor i sigurisë për kantonin e Cyrihut, e përshkroi sulmin si një “akt të neveritshëm terrorizmi që u trajtua shumë mirë nga policia, e cila arriti të parandalonte diçka edhe më të keqe”.
Fehr, duke folur në një konferencë për shtyp, vlerësoi një mësuese që qëndroi para nxënësve të saj për t’i mbrojtur ata para se burri të arrestohej.
“Kishte disa njerëz të guximshëm”, tha Fehr, përfshirë mësuesin i cili “u soll në një mënyrë shembullore”.
Shefi i policisë së kantonit të Cyrihut, Marius Wegermann, tha se në vitin 2015, policia ishte njoftuar për të dyshuarin për përhapje propagande për organizatën terroriste të Shtetit Islamik.
“Motivi për këtë akt duhet të kërkohet në fushën e radikalizimit dhe ekstremizmit”, tha Wegermann.
Gazeta zvicerane Blick raportoi se kishte siguruar një video që tregonte burrin duke vrapuar nga stacioni i Winterthurit duke bërtitur “Allahu Ekber”.
Tre viktimat e sulmit janë në spital, tha policia. Një burrë u godit me thikë në këmbë, një tjetër në qafë dhe një burrë i tretë u godit me thikë në kofshë.
