Ministria e Jashtme franceze ka nisur procedura disiplinore ndaj ambasadorit të Francës në Republikën e Afrikës Qendrore, Bruno Fouché, pas një hetimi administrativ mbi sjelljen e tij në rezidencën zyrtare në Bangui.
Në qendër të hetimit janë vizitat e shpeshta të dhjetëra grave të reja në rezidencën e ambasadorit, disa prej të cilave dyshohet se kanë qëndruar edhe gjatë natës, duke ngritur shqetësime për respektimin e protokolleve të sigurisë.
Sipas gazetës britanike “The Guardian”, e cila citon median investigative franceze “Le Canard enchaîné”, diplomati 65-vjeçar dyshohet se ka pritur rreth 30 gra, të moshave 20 deri në 30 vjeç, gjatë periudhës nga janari 2024 deri në mars 2026.
Raportohet se disa prej tyre kanë kaluar natën në rezidencën zyrtare, ndërsa vizitat thuhet se kanë qenë aq të shpeshta sa kanë tërhequr vëmendjen e zyrtarëve francezë.
Sipas “Le Canard enchaîné”, e cila pretendon se ka pasur qasje në raportin e inspektimit, Fouché ka pritur rreth 15 vizita të tilla në muaj. Raporti dyshohet se përmend edhe një rast kur ambasadori ka udhëzuar stafin të lejonte një prej grave të qëndronte në rezidencë edhe në mungesë të tij.
Ambasadori, sipas raportimeve, ka pranuar se ka pasur marrëdhënie seksuale me dy prej grave të reja.
Ministria e Jashtme franceze ka konfirmuar se një hetim administrativ është zhvilluar në Bangui gjatë vitit 2026 dhe se, pas përfundimit të tij, janë nisur procedurat disiplinore ndaj diplomatit.
Një inspektim në terren është kryer në prill, ndërsa gjetjet e tij i janë përcjellë ministrisë dhe kanë çuar në nisjen e procedurave.
Bruno Fouché është diplomat karriere dhe mban postin e ambasadorit të Francës në Republikën e Afrikës Qendrore që prej vitit 2023. Më herët ka shërbyer si ambasador në Liban, Iran dhe Çad.
Rasti vjen në një moment të ndjeshëm për marrëdhëniet mes Francës dhe Republikës së Afrikës Qendrore. Parisi po përpiqet të rivendosë ndikimin dhe marrëdhëniet diplomatike me Bangui, ndërsa Rusia ka zgjeruar ndjeshëm praninë e saj në vend.
Forcat ruse të lidhura me grupin Wagner kanë pasur një rol të rëndësishëm në sigurinë e presidentit të Republikës së Afrikës Qendrore, Faustin-Archange Touadéra.
Franca ka akuzuar Moskën për nxitjen e ndjenjave anti-franceze në disa vende afrikane, në një kohë kur ndikimi francez në ish-kolonitë e tij në kontinent është dobësuar.
Në mars, ministri i Jashtëm francez Jean-Noël Barrot vizitoi Bangui, ku deklaroi se marrëdhëniet mes dy vendeve po hynin në një fazë të re dhe foli për “rivendosjen e plotë të marrëdhënieve”.
Procedurat disiplinore ndaj ambasadorit Bruno Fouché janë ende në vijim.
