Presidenti amerikan Donald Trump ka kërcënuar se do ta shpallë Ngushticën e Hormuzit “territor të Shteteve të Bashkuara”, në një deklaratë të bërë ndërsa përpjekjet diplomatike për t’i dhënë fund luftës me Iranin mbeten në ngërç.
Gjatë një fjalimi në një akademi policie në Long Island, New York, Trump deklaroi se “shumë shpejt” do të caktojë ngushticën si territor amerikan. Ai pretendoi gjithashtu se Shtetet e Bashkuara kanë vendosur një bllokadë dhe se asnjë anije nuk mund të kalojë nëpër këtë rrugë ujore pa miratimin e Washingtonit.
“Pasi të përfundojmë mposhtjen e Iranit, i cili po mposhtet shumë keq, shumë shpejt do ta shpall ngushticën e Hormuzit territor të Shteteve të Bashkuara”, deklaroi Trump.
Ngushtica e Hormuzit është një nga korridoret detare më të rëndësishme në botë. Nëpër të kalon zakonisht rreth një e pesta e furnizimeve botërore me naftë të transportuar nga deti, duke e bërë çdo ndërprerje të lundrimit një kërcënim të drejtpërdrejtë për tregjet globale të energjisë.
Deklarata e presidentit amerikan vjen në një moment kur negociatat me Iranin kanë ngecur. Teherani ka refuzuar të rihapë plotësisht ngushticën, e cila është pothuajse e mbyllur që prej fillimit të konfliktit mes SHBA-së, Izraelit dhe Iranit.
Nënministri i Jashtëm iranian, Kazem Gharibabadi, reagoi ndaj deklaratës së Trump përmes platformës X, duke thënë se Irani nuk do të frikësohet nga kërcënimet apo shfaqja e forcës amerikane. Sipas tij, vendimi për hapjen ose mbylljen e ngushticës do të merret vetëm nga Irani.
Edhe ministri i Jashtëm iranian, Abbas Araqchi, deklaroi se Teherani nuk ka marrë vendim për të rifilluar negociatat me Washingtonin. Ai tha se mesazhet e shkëmbyera përmes Katarit dhe Pakistanit nuk përbëjnë negociata zyrtare.
Sipas Araqchit, bisedimet e zhvilluara me Omanin janë përqendruar në përcaktimin e një rruge detare përmes Ngushticës së Hormuzit. Irani kërkon që SHBA-ja të përmbushë disa kushte përpara se transporti detar të rifillojë normalisht.
