Një grua 75-vjeçare në Virxhinian Perëndimore është arrestuar nën akuzën për abuzim dhe neglizhencë ndaj bashkëshortit të saj 76-vjeçar, i cili, sipas autoriteteve, qëndroi për rreth 19 orë i pafuqishëm në banjën e banesës së tyre, pa ushqim dhe ujë.
Margaret Louise Rog u arrestua më 15 shtator dhe u dërgua në Burgun Rajonal të North Central. Ajo përballet me akuzën për abuzim, neglizhencë ose neglizhencë të rëndë ndaj një të rrituri të pafuqishëm, në rrethana që, sipas autoriteteve, paraqisnin rrezik të konsiderueshëm për dëmtime të rënda trupore ose vdekje.
Sipas kallëzimit penal, Rog u tha hetuesve se bashkëshorti i saj kishte hyrë në banjë rreth orës 15:00 të 20 gushtit, në shtëpinë e tyre në Morgantown. Autoritetet pretendojnë se gjatë 19 orëve në vijim ajo nuk kërkoi ndihmë dhe nuk telefonoi shërbimet e emergjencës, ndërsa 76-vjeçari mbeti në gjendje të rënduar.
Burri, i cili vuante nga Alzheimeri dhe demenca, u gjet më 21 gusht nga një terapist i të folurit. Sipas dokumenteve gjyqësore, terapisti e përshkroi gjendjen e tij si jashtëzakonisht të rëndë dhe alarmante.
76-vjeçari u dërgua me urgjencë në spital, ku qëndroi i shtruar deri më 31 gusht, kur ndërroi jetë.
Autopsia përcaktoi se sepsa dhe pamjaftueshmëria kardiake ishin shkaqet e vdekjes. Sipas ekspertëve mjekoligjorë, lëndimet që ai kishte pësuar gjatë kohës që ndodhej në banjë luajtën gjithashtu një rol të rëndësishëm në përkeqësimin e gjendjes së tij.
Rog i ka mohuar akuzat. Çështja ndodhet tashmë përpara drejtësisë dhe pretendimet e ngritura ndaj saj do të duhet të provohen gjatë procesit gjyqësor.
