Një ngjarje e rëndë ka tronditur qytetin e Reading, në Massachusetts të SHBA-së, ku një nënë 49-vjeçare është gjetur e vrarë me armë zjarri brenda banesës së saj.
Për vrasjen dyshohet djali i saj 22-vjeçar, i cili u largua nga banesa pas ngjarjes dhe u arrestua pas disa orësh kërkimesh në shtetin fqinj të Vermontit.
Andria Hanafin u gjet e pajetë në kuzhinën e shtëpisë rreth orës 00:38 të së enjtes, pasi bashkëshorti i saj, Matthew Hanafin, u kthye nga puna dhe telefonoi shërbimet e emergjencës. Gruaja u shpall e vdekur në vendngjarje.
Sipas prokurores së qarkut Middlesex, Marian Ryan, në banesë ndodhej edhe djali 13-vjeçar i çiftit. Ai u tha hetuesve se e kishte parë për herë të fundit nënën e tij rreth orës 17:00, përpara se të dilte me miqtë. Kur u kthye në shtëpi, rreth orës 21:00, shkoi direkt në dhomën e tij.
Ndërkohë, djali i madh i familjes, Ryan Hanafin, 22 vjeç, rezultonte i zhdukur, së bashku me automjetin e tij, një Dodge Charger i zi i vitit 2010.
Autoritetet nisën kërkimet për të riun, ndërsa policia e Massachusetts njoftoi atë të Vermontit për mundësinë që ai të ndodhej në zonën e Warrenit, rreth 270 kilometra larg Reading.
Të enjten pasdite, rreth orës 14:30, policia e Vermontit lokalizoi automjetin dhe ndaloi drejtuesin e tij. Ryan Hanafin u arrestua dhe u akuzua për statusin e personit të arratisur nga drejtësia. Ai u mbajt në paraburgim pa mundësi lirimi me kusht dhe pritet të dalë para gjykatës të premten pasdite.
Prokurorja bëri të ditur se i riu kishte në dispozicion disa armë zjarri të zotëruara ligjërisht. Leja e tij për mbajtjen e armëve u pezullua të enjten në mëngjes. Sipas autoriteteve, para ngjarjes nuk kishte pasur kontakte të njohura të tij me policinë, ndërsa nuk u raportuan probleme të njohura të shëndetit mendor. Motivi i dyshuar i vrasjes nuk është bërë ende publik.
Andria Hanafin, nënë e tre fëmijëve, është kujtuar nga familjarët dhe miqtë si një grua e dashur dhe gjithmonë e gatshme për të ndihmuar të tjerët. Vajza e saj ndodhej jashtë shtetit për studime universitare në momentin e ngjarjes.
“Është e pamundur të përshkruhet dhimbja e humbjes së dikujt kaq papritur dhe në mënyrë tragjike”, shkroi mikja e familjes, Heather Gagliardi, në një fushatë online për mbledhjen e fondeve.
Ajo e përshkroi 49-vjeçaren si një person me zemër të artë, që kujdesej për të tjerët dhe ndihmonte këdo që kishte nevojë. Hetimet për zbardhjen e plotë të rrethanave të vrasjes vijojnë.
