Vlerësimet e para për gjendjen shëndetësore të Papa Leo XIV pas ndërhyrjes kirurgjikale për heqjen e një tumori kanceroz nga mushkëria e djathtë janë inkurajuese.
Sipas ekspertëve të cituar nga CNN, zbulimi i hershëm i sëmundjes dhe heqja kirurgjikale e tumorit janë faktorë pozitivë për prognozën, ndërsa nevoja për trajtim të mëtejshëm do të përcaktohet nga rezultatet e analizave pas operacionit.
Ndërhyrja u krye të martën, më 13 tetor, në Spitalin Universitar Agostino Gemelli në Romë. Sipas informacioneve të bëra publike, kirurgët hoqën një nyje pulmonare të diagnostikuar si adenokarcinomë, një nga format më të zakonshme të kancerit të mushkërive. Operacioni përfshiu heqjen e lobit të poshtëm të mushkërisë së djathtë dhe përfundoi pa ndërlikime.
Adenokarcinoma bën pjesë në grupin e kancereve të mushkërive me qeliza jo të vogla dhe përbën rreth 40% të rasteve. Kur zbulohet në fazat e hershme dhe tumori është i kufizuar, ndërhyrja kirurgjikale mund të jetë trajtimi kryesor, me synimin për të hequr plotësisht indin malinj.
Një nga faktorët më të rëndësishëm në rastin e Papa Leo XIV është zbulimi i hershëm i tumorit. Sipas deklaratave të mëparshme të tij, lezioni në mushkëri u identifikua në një fazë shumë të hershme, duke bërë të mundur planifikimin e ndërhyrjes kirurgjikale.
Pneumologia Juanita Mora, zëdhënëse e Shoqatës Amerikane të Mushkërive, vlerësoi për CNN se këto rrethana janë pozitive për ecurinë e sëmundjes. Sipas saj, fakti që tumori ishte i lokalizuar dhe u hoq kirurgjikalisht mund të përmirësojë ndjeshëm prognozën.
Gjithashtu, gjendja e përgjithshme fizike e Papës, i cili është 71 vjeç, nuk pi duhan dhe merret me aktivitet fizik, mund të ndihmojë në procesin e rikuperimit.
Megjithatë, heqja e një lobi të mushkërisë kërkon kohë që organizmi të përshtatet me kapacitetin e reduktuar të frymëmarrjes. Për këtë arsye, rikuperimi do të shoqërohet me fizioterapi respiratore dhe ushtrime të posaçme për të përmirësuar funksionin pulmonar. Mjekët do të tregojnë gjithashtu kujdes të veçantë për parandalimin e infeksioneve të frymëmarrjes.
Pavarësisht përfundimit pa komplikacione të operacionit, përgjigjja përfundimtare mbi ecurinë e sëmundjes do të vijë pas analizave të mëtejshme.
Një rëndësi të veçantë do të ketë ekzaminimi histologjik i indit të hequr dhe kontrolli i nyjeve limfatike, për të përcaktuar nëse qelizat kancerogjene janë përhapur përtej zonës së prekur.
Nëse analizat tregojnë përhapje të sëmundjes, mjekët mund të shqyrtojnë mundësinë e trajtimit plotësues me kimioterapi ose radioterapi. Ndërkohë, testet molekulare dhe biomarkerët mund të ndihmojnë në identifikimin e trajtimeve të personalizuara, përfshirë terapitë e synuara dhe imunoterapinë.
Sipas ekspertes Juanita Mora, shpresa është që bëhet fjalë për një tumor të lokalizuar, për të cilin ndërhyrja kirurgjikale mund të jetë trajtimi i vetëm i nevojshëm. Megjithatë, kjo do të konfirmohet vetëm pasi të njihen rezultatet e plota të analizave.
Rezultatet e ekzaminimeve do të ndikojnë gjithashtu në përcaktimin e kohës së rikuperimit dhe nëse Papa do të jetë në gjendje të realizojë udhëtimin e planifikuar në Amerikën Latine muajin e ardhshëm.
Për momentin, zbulimi i hershëm dhe përfundimi pa komplikacione i operacionit konsiderohen shenja pozitive, por prognoza përfundimtare mbetet e lidhur me fazën e saktë të sëmundjes dhe rezultatet e analizave pas ndërhyrjes.
