Pjesëmarrja në një sfidë virale në TikTok, e cila kombinon lojën e njohur “Gur, Gërshërë, Letër” me konsumimin e ushqimit në kohë rekord, pati një përfundim tragjik për një të re në Republikën Domenikane.
Sipas mediave spanjolle, ngjarja ndodhi në qytetin San Cristóbal, ku Katia Araujo humbi jetën nga asfiksia, pasi një copë pule i ngeci në fyt gjatë lojës.
E reja po merrte pjesë së bashku me miqtë e saj në një sfidë që ka fituar popullaritet në rrjetet sociale. Sipas rregullave të lojës, pjesëmarrësit luajnë “Gur, Gërshërë, Letër”, ndërsa fituesi ka mundësinë të hajë sa më shumë ushqim që mundet. Ndërkohë, pjesëmarrësit e tjerë duhet të vrapojnë deri në një pikë të caktuar dhe të kthehen përsëri.
Momentet tragjike të vdekjes së Araujos
Gjatë sfidës, Araujo tentoi të hante sa më shpejt, por u mbyt nga një copë pule, e cila i bllokoi rrugët e frymëmarrjes.
Miqtë e saj e kuptuan se e reja nuk mund të merrte frymë dhe tentuan t’i jepnin ndihmën e parë, por pa arritur ta shpëtonin.
Më pas, një fqinj mori përsipër ta transportonte me një automjet bujqësor drejt spitalit. Megjithatë, me të mbërritur në institucionin shëndetësor, u konstatua se e reja kishte ndërruar jetë.
Shqetësim për sfidat e rrezikshme në rrjetet sociale
Vdekja e Katia Araujos shkaktoi reagime të shumta në rrjetet sociale, duke rikthyer në vëmendje rreziqet që lidhen me sfidat e ndryshme virale në internet.
Sfida të tilla, të cilat shpesh realizohen me synimin për të grumbulluar shikime dhe për të rritur popullaritetin e përdoruesve, mund të kenë pasoja të rënda, veçanërisht kur përfshijnë konsumimin e sasive të mëdha të ushqimit brenda një kohe të shkurtër.
Kjo tragjedi vë në pah rreziqet që mund të lindin kur përpjekjet për të krijuar përmbajtje për rrjetet sociale shoqërohen me aktivitete që vënë në rrezik shëndetin fizik dhe jetën e njeriut.







