Pas skandalit, mbetet e paqartë se çfarë është diskutuar më konkretisht mes Burnham dhe personit që imitonte Wiles, si dhe sa gjatë ka vazhduar komunikimi mes tyre
Kryeministri i Mbretërisë së Bashkuar, Andy Burnham, është bërë pjesë e një incidenti të pazakontë sigurie, duke rënë viktimë pasi ka shkëmbyer mesazhe me një person që pretendonte të ishte Susie Wiles, shefja e stafit të presidentit amerikan, Donald Trump.
Sipas Politico, e cila citon burime zyrtare, komunikimi ka ndodhur pasi Burnham mori detyrën në korrik të këtij viti. Në atë moment, ai nuk kishte dyshuar se personi në anën tjetër të komunikimit po imitonte një zyrtare të lartë të Shtëpisë së Bardhë.
Downing Street nuk pranoi të komentonte rastin, duke deklaruar se nuk komenton çështjet që lidhen me sigurinë kombëtare.
Një burim i cituar nga Politico tha se mesazhet nuk përmbanin informacione “të rëndësishme”, megjithëse autoritetet britanike e trajtuan rastin me seriozitet.
Ambasada britanike në Uashington e ngriti çështjen me Shtëpinë e Bardhë, ndërsa brenda qeverisë britanike u shfaqën shqetësime se telefoni i Wiles mund të ishte hakuar sërish.
Shtëpia e Bardhë nuk ka dhënë koment për incidentin dhe ende nuk është bërë e ditur se kush qëndronte pas mesazheve apo nëse komunikimi ishte pjesë e një përpjekjeje më të gjerë për të mbledhur informacione.
Rasti rikthen në vëmendje një incident të ngjashëm të ndodhur rreth një vit më parë, kur senatorë, guvernatorë dhe drejtues biznesesh në SHBA morën mesazhe dhe telefonata nga një person që pretendonte se ishte shefi i stafit të Trump. Në atë kohë, vetë Susie Wiles u kishte thënë bashkëpunëtorëve se telefoni i saj ishte hakuar.
