Në minutën e 44-t të ndeshjes Besëlidhja–Korabi, e zhvilluar në Lezhë, futbollisti Lorenc Trashi ka rënë pa ndjenja në fushë, duke shkaktuar momente paniku te lojtarët dhe tifozët.
Sipas raportimeve, Trashi nuk ka pasur kontakt fizik me ndonjë prej lojtarëve, por është rrëzuar papritur. Stafi mjekësor ka ndërhyrë menjëherë, duke i dhënë ndihmën e parë dhe duke e sjellë në vete në fushë.
Më pas, futbollisti është transportuar me autoambulancë drejt Spitalit të Lezhës për kontrolle të mëtejshme.
Trajneri i Besëlidhjes, Elvis Plori, ka bërë me dije se gjendja e Trashit është e mirë. Sipas tij, futbollisti ka pasur një dhimbje të fortë dhe bllokim në stomak. Ai vijon të jetë nën mbikëqyrjen e mjekëve, ndërsa rreziku më i madh raportohet se ka kaluar.
Sa i përket ndeshjes, pjesa e parë u mbyll me rezultatin 0-1, në favor të Korabit, pas golit të Markut në minutën e 24-t.
