E reja 25-vjeçare, Ana Dyrmishi, e cila dy ditë më parë pësoi djegie në rreth 85% të sipërfaqes së trupit, si pasojë e zjarrit të rënë në hotelin “Brooklyn” në Vlorë ku po qëndronte për pushime, është nisur për trajtim të specializuar në Turqi.
Ministria e Shëndetësisë thotë se pas përfundimit të të gjitha procedurave mjekësore në bashkëpunim dhe koordinim me Ambasadën e Turqisë dhe autoritetet shëndetësore turke, pacientja do të vijojë trajtimin e specializuar në një spital në Turqi.
Ndërkohë shpenzimet për trajtimin e pacientes në Turqi do të mbulohen nga shteti shqiptar.
Njoftimi:
Pacientja 25-vjeçare, A. D., e cila dy ditë më parë pësoi djegie në rreth 85% të sipërfaqes së trupit, si pasojë e zjarrit të rënë në hotelin ku po qëndronte për pushime, është nisur për trajtim të specializuar në Turqi.
Pas përfundimit të të gjitha procedurave mjekësore dhe administrative nga Qendra Spitalore Universitare “Nënë Tereza” (QSUT),ku qëndroi nën kujdes intensiv të ekipeve të terapisë intensive (ICU), në bashkëpunim dhe koordinim me Ambasadën e Turqisë dhe autoritetet shëndetësore turke, pacientja do të vijojë trajtimin e specializuar në një spital në Turqi.
Shpenzimet për trajtimin e pacientes në Turqi do të mbulohen nga shteti shqiptar, përmes Ministrisë së Shëndetësisë dhe Mirëqenies Sociale.
Ministria e Shëndetësisë dhe Mirëqenies Sociale mbetet e angazhuar për të garantuar vijimësinë e kujdesit mjekësor dhe aksesin në trajtimin e specializuar për rastet që kërkojnë ndërhyrje dhe ekspertizë të avancuar jashtë vendit.
Ngjarja
Zjarri ra rreth orës 04:05 të mëngjesit të 16 gushtit, në ambientet e brendshme të hotelit “Brooklyn”, në lagjen “10 Korriku”, në Lungomare të Vlorës.
Sipas Policisë së Vlorës, pas këqyrjes së pamjeve të kamerave të sigurisë, zjarri dyshohet se ishte aksidental dhe nisi nga djegia e një prize elektrike të frigoriferit në ambientet e restorantit.
Flakët u përhapën në hotel ndërsa pushuesit ndodheshin në dhomat e tyre. Situata u bë veçanërisht e rrezikshme në katin e dytë, ku disa prej pushuesve mbetën të bllokuar nga tymi dhe flakët. Disa prej tyre, për t’i shpëtuar zjarrit, u detyruan të dilnin nga dritaret dhe të hidheshin nga lartësia, duke pësuar dëmtime.
Personat e lënduar
Sipas njoftimit zyrtar të Policisë, 6 persona u lënduan. Pesë prej tyre u transportuan për trajtim në Tiranë, ndërsa një tjetër mori ndihmë mjekësore në Spitalin Rajonal të Vlorës.
Ana Dyrmishi, 25 vjeç – djegie në rreth 85% të trupit;
Aldo Kasimi, 30 vjeç – djegie në rreth 30% të trupit;
Ndorina Rexhepi, 25 vjeç;
Arlinda Rexhepi, 27 vjeç;
Erza Grainca, 21 vjeç;
Luan Saliu, 21 vjeç.
Një pjesë e të lënduarve pësuan dëmtime nga kërcimi nga kati i dytë, ndërsa të tjerë pësuan djegie dhe dëmtime nga ekspozimi ndaj flakëve dhe tymit.
